Jam 3 | NdeIBE | STEP | Bazalwane bami, abanengi benu akumelanga babe ngabafundisi, ngoba liyakwazi ukuthi thina esifundisayo sizakwahlulelwa kalukhunikazi.

James 3

Ukuthambisa ulimi

1 Bazalwane bami, abanengi benu akumelanga babe ngabafundisi, ngoba liyakwazi ukuthi thina esifundisayo sizakwahlulelwa kalukhunikazi. 2 Sonke siyakhubeka ngezindlela ezinengi. Uma umuntu engakaze abe lesici kulokho akutshoyo, ungumuntu opheleleyo, owanelisayo ukuwubamba wonke umzimba wakhe.

3 Lapho sifaka amatomu emilonyeni yamabhiza ukuba asilalele, ibhiza singaliphendula lonke. 4 Loba thathani imikhumbi njengesibonelo. Lanxa imikhulu kangaka njalo iqhutshwa yimimoya elamandla, iqondiswa ngophinyana oluncane loba kungaphi lapho umtshayeli afuna ukuya khona. 5 Ngokufanayo ulimi luyisitho esincane somzimba, kodwa luyazincoma kakhulu. Cabangani ngehlathi elikhulu elithungelwa yinhlansi encane yomlilo.

6 Ulimi lalo lungumlilo, umhlaba wobubi phakathi kwezitho zomzimba. Lungcolisa lonke uqobo lomuntu, luyithungele ngomlilo yonke impilo yakhe, lalo luthungelwe ligehe ngomlilo.

7 Zonke izinhlobo zezinyamazana, lezezinyoni, lezezihuquzelayo kanye lezidalwa zasolwandle ziyathanjiswa njalo sezathanjiswa ngumuntu, 8 kodwa akulamuntu ongathambisa ulimi, luyibubi obuyaluzelayo, lugcwele itshefu ebulalayo.

9 Ngolimi siyabonga iNkosi uBaba, njalo ngalo sithuka abantu abenziwa ngesifanekiso sikaNkulunkulu.

10 Emlonyeni munye kuphuma ukubonga lokuthuka. Bazalwane bami, lokhu akufanelanga.

11 Kambe amanzi amnandi lamanzi aletshwayi angagobhoza mthombo munye na?

12 Bazalwane bami, umkhiwa ungathela amaoliva na, kumbe ivini lithele imikhiwa na? Lomthombo oletshwayi awungeke ukhuphe amanzi amnandi.

Izinhlobo ezimbili zokuhlakanipha

13 Ngubani ohlakaniphileyo loqedisisayo phakathi kwenu na? Kakubo-nakalise ngokuphila kwakhe kuhle, langezenzo ezenziwa ngokuzithoba okuvela ekuhlakanipheni.

14 Kodwa uma ligcine umhawu lokulangazela kobukhwele ezinhliziyweni zenu, lingazincomi ngakho kumbe liphike iqiniso.

15 “Ukuhlakanipha” okunjalo kakwehli kuvela ezulwini kodwa ngokwasemhlabeni, akusikomoya, ngokomubi. 16 Ngoba lapho okulomhawu khona lokutshisekela kokuzisuthisa kulapho okutholwa khona ingxabangxoza kanye lezenzo zonke ezimbi.

17 Kodwa ukuhlakanipha okuvela ezulwini okokuqala kuhlambulukile; besekuthanda ukuthula, kulozwelo, kuyazehlisa, kugcwele isihawu lezithelo ezinhle, kakukhethi njalo kuqotho. 18 Abalamuli abahlanyela ukuthula bathola isivuno sokulunga.